نووسەر و ڕووناكبیر (بەختیار عەلی)، پێی وایە كە نەوەی ئێستا تووڕەیە، بەڵام زمانی خۆی نەدۆزیوەتەوە. لە لایەكی دیكەیشەوە، هەندێك چاودێر و ڕۆژنامەنووس، لەسەر ئەو باوەڕەن كە ئەجێندای سیاسیی ئۆپۆزسیۆن، ڕێڕەوی ڕاستەقینەی خۆپێشاندەرە “گەنجەكان”ـی گۆڕیوە و، ڕاوێژكارێكی حكوومەتیش، دەڵێت كە سەرەتا داخوازیی “گەنجان”، داخوازیی سەرجەم كوردستان بوو، بەڵام دواتر بە سیاسی كران.
ماوەی زیاتر لە (45) ڕۆژە خۆپێشاندانەكانی بەر دەركی “سەرا”ـی شاری سلێمانی بەردەوامن، لە كاتێكدا كە دەستەڵاتی سیاسی لە هەرێمی كوردستاندا هەر هەنگاوێكی كردەیی كە دەیهاوێت، لە لایەن ئۆپۆزسیۆن و ئەنجوومەنی كاتیی خۆپێشاندەرانەوە، بە "خۆڵكردنەچاوی خەڵك" لێك دەدرێتەوە.
لەو نێوەندەیشدا، بە باوەڕی ڕووناكبیران و چاودێرانی ڕەوشی ئێستای پارێزگای “سلێمانی”، گەنجان بكەرێكی ڕاستەقینەی ناو خۆپێشاندانەكانن، هاوكات داخوازیی ئەو گەنجانەیش، كەوتووەتە پەراوێزێكی سیاسییەوە كە ئۆپۆزسیۆن خوڵقاندوویەتی.
لە ئێستادا پرسیارێكی گرنگ هاتووەتە ئاراوە كە ئایا ڕووخاندنی حكوومەت كێشە هەنووكەییەكانی گەنجان چارە دەكات؟ یاخود ئەگەر ئۆپۆزسیۆن خاوەنی خۆپێشاندانەكان و هەروەها پڕۆسەی چاكسازییە، گەنجان لە كوێی هاوكێشەكەدان؟ لە یەكێك لە سیمینارەكانیدا، نووسەر و ڕۆماننووس(بەختیار عەلی)، پێی وایە كە ئەو نەوەیەی كە ئێستا خۆپێشاندان دەكات، نەوەیەكی تووڕەیە، بەڵام زمانی خۆی نەدۆزیوەتەوە.
ئەو، هەروەها بڕوای وایە كە داخوازیی ڕووخاندنی حكوومەت، كێشە سەرەتاییەكانی ئەوان چارە ناكات. (بەختیار عەلی)، لەسەر ئەو باوەڕەیە كە ئەو نەوە تووڕەیە، دەبێت زمانی عەقڵانیی خۆیان بدۆزنەوە و خۆیان ڕكێفی ژیانی سیاسیی خۆیان بگرنە ئەستۆ.
ئەو بۆچوونەی (بەختیار عەلی)، لە كاتێكدایە كە ئەگەر ئاوڕێكی سەرپێیی لە ڕاگەیاندنەكانی ئۆپۆزسیۆن و بە تایبەت بزووتنەوەی “گۆڕان” و هەروەها ڕاگەیاندراوەكانی ئەنجوومەنی كاتیی خۆپێشاندەرەكاندا بدەینەوە، بۆمان دەردەكەوێت كە پەیامەكان لە ڕاگەیاندنەكانی ئۆپۆزسیۆندا، ئاڕاستەی ئەو گەنجە تووڕانەی مەیدانی “ئازادی” دەكرێت.
لێرەدا نیگەرانیی ڕووناكبیر (بەختیار عەلی)، پاساوێكی بەجێ و ڕوویەكی شیاوی تێڕامانی هەیە كە گەنجان بۆ زمانی خۆیان نەدۆزیوەتەوە؟ پرسیاری سەرەكی لێرەدا ئۆپۆزسیۆنە كە دەیەوێت وەكوو كارتێكی سیاسی تووڕەیی ئەو گەنجانەی هەبێت؟ یان لە لایەكی دیكەیشەوە ئایا دەستەڵاتی سیاسی خۆی كردووەتە خاوەنی ئەو تووڕەییە؟ مامۆستای زانكۆ و چاودێری سیاسی (هێمن میرانی)، پێی وایە كە لە هەموو جێگەیەك و لە هەموو حاڵەتێكدا ئەو كەسانەی خۆپێشاندەران دەلاوێننەوە و قسەی دڵی ئەوان دەكەن، ئۆتۆماتیك دەبنە خاوەنی خۆپێشاندانەكان.
ئەو چاودێرە، هەروەها لەسەر ئەو باوەڕەیە كە دەستەڵاتی سیاسیی هەرێمی كوردستان، گرەوی لەسەر ماندووكردنی خۆپێشاندەران كرد، ئەوەیش بۆشاییەكی لە نێوان خۆپێشاندەران و دەستەڵاتدا دروست كرد. (هێمن میرانی)، نایشارێتەوە كە ئۆپۆزسیۆن لە سلێمانی ئەو بۆشاییەی دۆزییەوە و خۆی كردە خاوەنی خۆپێشاندەرەكان، بەڵام بە باوەڕی ئەو مامۆستایەی زانكۆ، تاكوو ئێستایش هیچ لایەنێك بە دەستەڵات و ئۆپۆزسیۆنەوە قسەی دڵی گەنجانی كوردستان ناكەن، چونكە گرەوە سیاسییەكان داخوازییە بنەڕەتی و سەرەكییەكانی گەنجەكانی خستووەتە پەراوێزەوە.
رۆژنامەنووس و چالاكوانی مەدەنی (هەڤاڵ نەژاد)، پێی وایە كە نەوەی دوای ڕاپەڕین و شەڕی خۆكوژی، نەوەیەكی تووڕەیە و ئەو تایبەتمەندییەیشی لەو قۆناغە مێژووییە بۆ ماوەتەوە. بە باوەڕی ئەو، دووئیدارەیی و ژیانی منداڵی بەرپرسەكان و هەروەها گەندەڵی و هەندێك دیاردەی نەشیاویش، كاریگەری لە دۆخەكە كردووە. (هەڤاڵ نەژاد)، ئەوەیشی نەشاردەوە كە تووڕەییەكە بەشێك بۆ گەنجان دەگەڕێتەوە كە هەوڵی دۆزینەوەی ڕێگەیەكی عەقڵانییان بۆ خاوەندارێتیی خۆیان نەداوە، بەڵام پێیشی وایە كە بەشێكی گرنگیشی بۆ دەستەڵات دەگەڕێتەوە كە نەیتوانیوە لە ڕێگەی بنبڕكردنی گەندەڵی و عەدالەتی كۆمەڵایەتییەوە، زەوینە بۆ فیكری سەربەخۆیی گەنجی ئەم وڵاتە بڕەخسێنێت.
سەبارەت بەوەی كە ئۆپۆزسیۆن و لە سەرووی هەموویشیانەوە بزووتنەوەی “گۆڕان” لە كایەكردن لەو بۆشاییەدا تەمسیلی خاوەندارێتیی خۆپێشاندەران دەكات، ئەو ڕۆژنامەنووسە گەنجە، دەڵێت كە ئۆپۆزسیۆنی ئەمڕۆی كوردستان مێژوویەكی هاوبەشی دەستەڵاتی بە هەموو تایبەتمەندییەكانەوە هەیە، بەڵام گەنجان ئەمڕۆ بۆ نەخنكان دەست بە هەموو چڵێكەوە دەگرن و ئەوەیش لە بەرژەوەندیی فیكر و سەربەخۆیی گەنجاندا نییە، هەر بۆیەیش بە باوەڕی (نەژاد)، دەستەڵاتی سیاسی لە هەرێمی كوردستاندا دەبێ خۆی بكاتە خاوەنی داخوازییەكانی خەڵكی كوردستان و، بە بنبڕكردنی گەندەڵی و جێبەجێكردنی داواكارییەكانی خۆپێشاندەران و بە تایبەت توێژی گەنجان، وەكوو بكەری ناو گۆڕەپانی چاكسازی دەربكەوێت.
لە لایەكی دیكەیشەوە، گەنجان لە هەرێمی كوردستادا پێش (17/2)ـیش ڕاستەخۆ و ناڕاستەوخۆ لە ڕێگەی خۆپێشاندانەكانەوە داواكاریی خۆیان بەرز كردووەتەوە و ناوەندی بڕیاریش لە هەرێمی كوردستاندا ڕاستەوخۆ لەگەڵیاندا كۆ بووەتەوە، بێ ئەوەی خوێندنەوەیەكی سیاسی بۆ داواكاریی خۆپێشاندەرانی پێش (17/2) بكرێت.
لێرەدا دەتوانین بڵێین كە ئەو كاتەی ئەجێندای سیاسیی ئۆپۆزسیۆن خرایە ناو داخوازییە ڕەواكانی گەنجانی كوردستانەوە، بە تایبەت گەنج “بكەر”ـبوونی خۆی لە دەست دا و ناوەندە ڕاگەیاندنەكانی بزووتنەوەی “گۆڕان” بەرەو ویستی خۆی ئاڕاستەی كردن.
سەبارەت بەو پرسەیش، ڕاوێژكاری سەرۆكی حكوومەتی هەرێم بۆ كاروباری گەنجان (فازڵ عومەر)، بۆ “هەولێر” باسی لەوە كرد كە پرس و كێشەكانی گەنج لە كوردستاندا، بنچینەیەكی تایبەت بە خۆی هەیە و لە دەستپێكی خۆپێشاندانەكانی “سلێمانی”ـدا دروست نەبووە. ئەو، ڕوونیشی كردەوە: “ئێمە لە ڕێگەی ڕاگەیاندنەكانەوە، زۆر بەر لەو خۆپێشاندانانە باسمان لە پرسی گەنج كردووە.”
ئەو ڕاوێژكارەی سەرۆكی حكوومەتی هەرێم، لەسەر ئەو باوەڕەیە كە “لە سەرەتادا خواستەكانی گەنجانی خۆپێشاندەر ئەوانەی ئێمە و سەرجەم كوردستان بوون، بەڵام دوای درێژەكێشانی خۆپێشاندانەكان تێكەڵبوونێك لە نێو داخوازیی گەنجان و ئەجێندای ئۆپۆزسیۆندا دروست بوو.” (فازڵ عومەر)، ڕاشكاوانەتر لە چاودێران و ڕووناكبیران، دەڵێت كە گەنجان گوتار و داخوازییەكانی خۆیان لە بیر كردووە. ئەو، هەروەها پێیشی وایە كە بەردەوامیی خۆپێشاندانەكان، ڕێگەی بۆ ئەجێندای سیاسیی ئۆپۆزسیۆن خۆش كردووە و داخوازیی و گوتارە سەرەكییەكانی “گەنجان”ـی پەراوێز خستووە.
ژێوار ئیبراهیم
سەرنجی هەڤاڵ: ئەو لێدوانەی من لەم راپۆرتەدا بەشێکە لە لێدوانێکی درێژتری من بۆ رۆژنامەی هەولێر(ژمارە ١٠٠٧ یەکشەممە ٣-٤-٢٠١١)دەربارەی ئەو وتەیەی بەختیار عەلی نووسەر و رووناکبیر و تووڕەیی گەنجان، کە کورت کراوەتەوە. هیوادارم پەیامەکەم گەیشتبێتە خوێنەرانی رۆژنامەکە و بڵۆگەکەشم!
0 سەرنج:
Post a Comment