هەڤاڵ
نەژاد
کەمێک بەر لە ئێستا سەیری
ماڵپەڕی فەرمانگەی رێکخراوە نا حکوومیەکانم کرد، لە ڕێگەی ئەو ماڵپەڕەوە دەتوانی فۆڕمی
دامەزراندنی رێکخراو وەربگریت و زۆر بە ئاسانی رێکخراوێکی مەدەنی دروست بکەیت بێ هیچ
کێشەیەک، ئەمەش بەهۆی یاسای ژمارە ١ی ٢٠١١* کە یاسا کۆنەکەی هەڵوەشاندەوە.
بیرمە، کاتێک ئێمە رێکخراوێکمان
دروست کرد، دەبوو رەزامەندی ئاسایش و وەزارەتی ناوخۆ وەرگرین. هەموو ئەوانەی دەستەی
دامەزرێنەر بووین دەبووایە بچینە ئاسایش و یەک یەک چاوپێکەوتن بکەین!
کارمەندێکی ئاسایش پرسیاربارانی
دەکردی، پرسیاری وای دەکرد هەندێ جار خۆشت نەتدەزانی!
چەند کەسن لە ماڵەوە؟ ناوی
هەموویان، تەمەنیان، لەهەمووی گرنگتر ئەندامی چ حیزبێکە؟
چەند مامت هەیە؟ ناوی هەموویان،
تەمەنیان، لەهەمووی گرنگتر ئەندامی چ حیزبێکە؟
بەکورتی؛ چەند پور، چەند
خاڵ، چەند... بەهەمان شێوەی سەرەوە!
خۆت ئەندامی چ حیزبێکی؟
ئەمەیان هەر زۆر گرنگ بوو وای ئەگەر لە حیزبی کاکی ئاسایش نەبوویتایە یا نەیارەکەی
بوویتایە، ٢ مانگ مۆڵەتی ڕێکخراوەکەتان دوادەکەوت.
هەڵبەتە ئەگەر ئەندامی حیزبی
حکوومڕان بوویتایە زوو مۆڵەتی رێکخراوەکەت وەردەگرت.
کاتێک کارمەندەکەی ئاسایش
ئەو پرسیارانەی لە خۆم کرد، خێڵ و عەشرەت هەمووی بە کەیفی کاکی ئاسایش بوون، کە هاتە
سەر خۆم گوتم بێ لایەنم! وتی شتی وا نابێ، دەبێ لایەنێک بڵێی، گوتم: بنووسە پاسۆک*!
سەرێکی لەسەر فۆرمەکە بەرزکردەوە و وەک ئەوە وابوو جنێوی پێ بدەم! مۆڕەیەکی کرد و ناچار
نووسی! ئاخر پاسۆک نەماوە و کاکی ئاسایش پێی وایە ئەو حیزبە لە ناو حیزبەکەی ئەودا
تواوەتەوە و ئێستا تۆ بۆی زیندووکەیتەوە! حەی حەی!
سەرتان نەیەشێنم، ئەو قسەیەی
من و برادەرێکی تر کە لایەنە سیاسییەکەی بەدڵی کاکی ئاسایش نەبوو، ماوەیەکی باش مۆڵەتەکەیان
دواخستین.
ئەم چاوپێکەوتنەی ئاسایش،
کە زۆر ناخۆش و وەرسکەر بوو، ئێوە تەنها سەر با دەدەن بە خوێندنەوەی، بەڵام ئەو هاوڕێیانەی
ساڵانی رابردوو بەشداربوون لە دامەزراندنی
رێکخراو دەزانن و بیریان دەکەوێتەوە چەندە ناخۆش بوو.
لەگەڵ ئەوەشدا رێکخراوەکەمان
(ناوەندی ئایندە بۆ پرسەکانی گەنج)* دامەزرا و بووین بە باشترین رێکخراوی لاوان لەسەر
ئاستی کوردستان و خەڵاتی حکوومەتمان وەرگرت. هەروەها لەگەڵ هاوکارانمدا رۆڵی بەرچاومان
گێڕا لە گۆڕێنی ئەو یاسایە و دوو کۆنفرانسی هەرێمایەتیمان بۆ سازدا، لە شارەکانی
کوردستان کۆبوونەوەی فراوانمان بۆ ساز کرد. سەرەنجام یاساکە گۆڕا و ئێستا دەتوانن لەگەڵ دوو برادەری فەیسبووک،
لە رێگەی فەیسبووکی فەرمانگەکەوە رێکخراوێک دروست بکەن و تەنها لە یەک پەنجەرەی فەرمانگەکەوە
کاروبارەکان ڕایی بکەن!
دڵنیام بەهۆی ئەم
یاسایە تازەیەوە رێکخراوی زۆر و بۆر دروست دەبێت، هیوام وایە رێکخراوە چالاکەکان بەهۆیەوە
بزر نەبن و بەڵکو زیاتر و روو لەگەشە بن!
* پێشووتر لە ئیدارەی
زەرد بە یاسای ١٥ و یاسای ١٨ و لە ئیدارەی سەوزیش بە بڕیاری ٢٩٧ رێکخراو
دادەمەزرا، بەو دەردەسەرییەی سەرەوە!
* پاسۆک: پارتی
سۆشیالیستی کورد، پارتێکی نەتەوەیی بوو لە ١٩٧٦ دامەزراو و تا پاش ڕاپەڕین چالاک
بوو.
* ئێستا لەو رێکخراوە
نەماوم.
0 سەرنج:
Post a Comment