هه‌ڤاڵ نه‌ژاد
له ماڵپه‌ڕی هاوڵاتی، به‌یاننامه‌ی کۆمه‌ڵێک خه‌مخۆری ئه‌لعێراق بڵاوبۆته‌وه، که به‌ناوی 125 که‌سایه‌تی عێراق نووسراوه. تێیدا بۆ ئه‌و (وه‌طه‌نه) خۆشه‌ویسته‌یان ده‌کرووزێنه‌وه و داوا ده‌که‌ن گه‌لی عێراق رووبه‌ڕووی ئه‌و هێزه ده‌سه‌ڵاتدارانه ببنه‌وه كه عێراقیان به‌م رۆژه گه‌یاندووه.
به‌یاننامه‌که هیچ که به‌زمانی عه‌ره‌بییه! به سه‌ردێڕی (الشعب قلعتنا الاخيرة) و به (بعد نضال بطولي لشعبنا العراقي) ده‌ست پێ ده‌کات. به‌یه‌ک وشه‌ش ناوی کورد، پرسی کورد، کێشه‌ی ماده‌ی 140 و ناوچه داگیرکراوه‌کان نه‌هاتووه. ئه‌مه‌ش لای من ئاساییه، چونکه کاتێک ده‌ڵێن؛ (شعب)ی عێراقی واته گه‌لی عێراق و مه‌به‌ستیان عاره‌به، له‌به‌ر ئه‌وه‌ی شعب تاکه و به‌کوردی ده‌بێته گه‌ل، که‌واته مه‌به‌ستیان کورد و گه‌لانی تر نییه، هه‌رچه‌نده سیاسییه کورده عێراقچییه‌کان ده‌ڵێن گه‌لانی ئه‌لعێراق!
کاتێک ده‌وترێت عێراق، لای من وڵاتێکی داگیرکه‌ر و وڵاتێکی بێ کوردستان و کورده، ئه‌گه‌ر به‌هیچ شێوه‌یه‌کیش له به‌یاننامه‌ی خه‌مخۆرانیدا ناوی کورد نه‌یه‌ت ئاسایییه. چونکه ئه‌وه‌ی خه‌مخۆری خاک و وڵاتی عێراق بێت، دوژمنی مافه‌کانی کورده!
به‌ڵام ئه‌وه‌ی بۆ من جێگه‌ی سه‌رنجه، زۆربه‌ی هه‌ره زۆری ئه‌وانه‌ی واژوویان کردووه، کوردن و خۆیان کردۆته که‌واسووری به‌رله‌شکر بۆ رێکخستنه‌وه‌ی ماڵی شێواوی عێراق. له یه‌که‌م تا 125 هه‌مین ناو جگه له پێنج شه‌ش عه‌ره‌ب، ئه‌وه‌کانی تر هه‌مووی رۆشنبیر و ئه‌کادیمی کورد و سیاسی کوردین! ئه‌مه‌ش ئه‌وه نیشان ده‌دات له بنه‌ڕه‌تدا کوردێک (به‌ڵام نا کوردستانیانه)به‌یاننامه‌یه‌ی نووسیوه!
ئێمه هه‌میشه ره‌خنه‌مان له سه‌رانی ده‌سه‌ڵاتی باشووری کوردستان گرتووه، به‌وه‌ی ئێمه‌یان لکانده‌وه به عێراق و ساڵی 2003 ده‌وڵه‌تی کوردستانیان دانه‌مه‌زراند. ره‌خنه‌مان لێ گرتوون و ده‌گرین، که هه‌میشه عێراقیانه کاریان کردووه نه‌ک کوردانه و کوردستانیانه. ته‌نات به‌شێکی ئه‌وانه‌ی ئه‌م به‌یاننامه‌یه نانه‌ته‌وه‌یییه‌یان واژوو کردووه، له‌وانه‌بوون که هه‌مان ره‌خنه‌یان له سیاسییه کورده عێراقچییه‌کان گرتووه.
ئه‌دی خێره ئێستا بۆ عێراق ده‌کرووزێنه‌وه و، داوا له گه‌لی عێراق ( نه‌ک گه‌لانیش) ده‌که‌ن به گژ ئه‌و که‌سانه بچێته‌وه که عیراقیان به‌و رۆژه گه‌یاند؟ خێره له که‌سایه‌تی نیشتمانی و نه‌ته‌وه‌یییه‌وه بوون به عێراقی؟ چۆنبێ، هه‌تا دوێنێ بوو ره‌خنه‌تان له سه‌رکردایه‌تی باشووری کوردستان ده‌گرت، که نانه‌ته‌وه‌یییانه کارده‌که‌ن و هه‌وڵی ئاوه‌دانکردنه‌وه و رێکخستنه‌وه‌ی نێوماڵی عه‌ره‌ب ده‌ده‌ن، که‌چی ئێستا ئێوه له‌وان زیاتر بوون به عێراقی؟
له ئێستادا که‌مپین و به‌یاننامه بڵاوکردنه‌وه بۆته مۆدیل، بێ ئه‌وه‌ی بزانن باسی چییه ناوی خۆیانی تێ ده‌خه‌ن، به‌تایبه‌ت ئه‌گه‌ر بزانن فڵان نووسه‌ر و فیسار شاعیری تێدایه! ئه‌گه‌ر که‌مپین دژی سپێتی ماست بێت، ناوی خۆیان ده‌نووسن و ده‌ڵێن ماست ره‌شه، چونکه فڵان نووسه‌ری بێ بیر وایگووتووه. ئه‌مه ته‌نها له‌به‌ر ئه‌وه‌ی ناویان بێته ناو ناوانه‌وه. هه‌ر بۆیه دڵنیام به‌شێکی زۆری ئه‌وانه‌ی واژوویان کردووه، ئاگاداری ناوه‌ڕۆکی ئه‌م به‌یاننامه عێراقچێتییه نین و له‌به‌ر ئه‌م و ئه‌و ناویان نووسیوه و واژوویان کردووه. یاخود بێ ئاگاداری خۆیان ناویان نووسراوه. هاوڕێیه‌کی خۆم که خه‌ڵکی رۆژهه‌ڵاتی کوردستانه، ناوی نووسراوه، بێ ئه‌وه‌ی ئاگاداری ئه‌و به‌یاننامه‌یه بێت و بێ ئه‌وه‌ی ته‌نانه‌ت زمانی عه‌ره‌بیش بزانێت!
وه‌ک چۆن کورد سه‌رکرده و سیاسییه‌کانی، له سه‌رکرده و سیاسی هیچ نه‌ته‌وه‌یه‌کی تر ناچێت، به‌هه‌مانشێوه رۆشنبیره‌کانی وان و خراپتریشن. ئاخر رۆشنبیری کامه نه‌ته‌وه‌ی ژێر ده‌ست خۆی به خه‌ڵکی ئه‌و وڵاته زانیوه که خاکه‌که‌ی داگیرکردووه؟ کام نووسه‌ری نه‌ته‌وه‌یه‌کی داگیرکراو و جینۆسایدکراو خۆی به خه‌ڵکی وڵاته داگیره‌که‌ره‌که‌ی زانیوه؟ ئه‌گه‌ر نووسه‌رێک به‌راست نووسه‌ری میلله‌ته‌که‌ی بێت، چۆن به‌خه‌م وڵاتی داگیرکه‌ره‌که‌یه‌وه ده‌بێت، له کاتێکدا سوور ده‌زانێت هه‌موو به‌هێزییه‌کی ئه‌و، لاوازی میلله‌ته‌که‌ی خۆیه‌تی؟
ئه‌م جۆره کاره نانه‌ته‌وه‌ییانه له‌ناو هه‌ر میلله‌تێکی هۆشیاردا بکرێت، بێ گومان بکه‌رانی ره‌خنه‌باران و شه‌رمه‌زار ده‌کرێن، به‌ڵام له‌ناو کوردا عێراقچێتی و ئێرانچێتی و تورکچێتی و سووریچێتی، نه‌ک جێگه‌ی شه‌رمه‌زاری نین، به‌ڵکو جێگه‌ی شانازین و به شانازییه‌وه ده‌ڵێن عێراقی، ئێرانی، سووری، تورکین و که‌مپین بۆ سه‌لامه‌تی وڵاته داگیرکه‌ره‌کان پێکدێنن و به‌یاننامه‌ی بۆ بڵاو ده‌که‌نه‌وه.
ئه‌گه‌ر کوردێک هۆشیاربێت، به‌راست رۆشنبیربێت ، هیچکاتێک خۆی به عێراقی، ئیرانی، تورکی و، سووری نازانێ! سه‌ت ساڵ له‌مه‌وبه‌ر شه‌ریف پاشای خه‌ندان، که هه‌شت زمانی ده‌زانی و دڵنیام هیچ یه‌ک له‌وانه‌ی ئه‌م به‌یاننامه‌یان واژوو کردووه، ئه‌وه‌نده زمان نازانن. دوای هه‌وڵدانێکی زۆری بۆ سه‌ربه‌خۆیی کوردستان و سه‌ره‌نجام شکست خواردنی به‌هۆی نایه‌کگرتوویی کورده‌وه. گوتی؛ که مردم ته‌رمه‌که‌م فرێ بده‌نه ده‌ریاوه، چونکه هاوڵاتی نیشتمانێکم بێ وڵاتی سه‌ربه‌خۆ! که‌چی دوای سه‌ت ساڵ و له سه‌ده‌ی ئازادی گه‌لان و مافی مرۆڤ، که‌سانێک که لاخۆی رۆشنبیر و سیاسی و ئه‌کادیمی و رۆژنامه‌وانن و به قسان په‌یامهێنه‌ری ئازادی و مافی مرۆڤن، دێن و عێراقچێتی ده‌که‌ن!
بۆ من وه‌ک کوردێک ناوی عێراق ئازارم ده‌دا، چ بگات به‌وه‌ی خۆم به‌عێراقی بزانم و خه‌م بۆ عێراقی داگیرکه‌ر بخۆم! من چاوه‌ڕێی ئه‌وه له نووسه‌ران و رۆشنبیران و ئه‌کادیمییه‌کانی کورد ده‌که‌م، ئه‌و هه‌ڵه‌یه‌ی سیاسییه‌کان ده‌یکه‌ن، ئه‌وان راستی بکه‌نه‌وه، نه‌ک خۆیان بێن لاسایی ئه‌وان بکه‌نه‌وه. چاوه‌ڕێ ده‌که‌م، نووسه‌ران و خاوه‌ن قه‌ڵه‌مه‌کانی کورد، پێشه‌نگی ئه‌وه بن که عێراقی بوونیان لا شه‌رمه‌زاری بێت و خه‌ڵکی ئاسایی له‌وه هۆشیار بکه‌نه‌وه که عێراقی بوون شه‌رمه، له‌به‌ر ئه‌وه‌ی به ده‌یان رێگا هه‌وڵی سڕینه‌وه‌ی ئێمه‌یانداوه. بۆیه ئه‌وانه‌ی ئه‌م که‌مپینه‌یان واژوو کردووه و خۆیان پێ عێراقییه، له‌مڕۆ به‌داوه لای من نیشانه‌ی پرسیار و گومان ده‌خرێته سه‌ر خۆیان و دڵسۆزیان بۆ ئه‌م میلله‌ته، هه‌تا ئه‌وکاته‌ی په‌شیمانی ده‌رده‌بڕن له‌م به‌یاننامه نا نه‌ته‌وه‌یی و شه‌رماوییه!
ناوه‌کان و به‌یاننامه‌که‌ش له‌م لینکه‌دا هه‌یه.
0 سەرنج:
Post a Comment