هەڤاڵ نەژاد: به‌شێك له‌ رێكخراوه‌كانی‌ كۆمه‌ڵی‌ مه‌ده‌نی‌ وه‌كو بازرگانی‌ سه‌یری‌ كاری رێکخراوەیی ده‌كه‌ن

لێدوانی من بۆ ماڵپەڕی سبەی و رادیۆی گۆڕان 

(سبەی) به‌شێك له ‌چالاكوانانی‌ كۆمه‌ڵی‌ مه‌ده‌نی‌ پێیانوایه‌، کە ژمارەیەک له‌ رێكخراوه‌كانی‌ كۆمه‌ڵی‌ مەدەنی وه‌كو بازرگانی‌ سه‌یری‌ كاری‌ رێكخراوه‌یی ده‌كه‌ن و ئاماژه‌ به‌وه‌ش ده‌كه‌ن، به‌شێك له‌ رێكخراوه‌كان له‌لایه‌ن حیزبه‌ ده‌سه‌ڵاتداره‌كانه‌وه‌ دروستكراون و به‌كار ده‌هێندرێن، سه‌رۆكی‌ فه‌رمانگه‌ی‌ رێكخراوه‌ ناحكومیه‌كانیش ده‌ڵێت به‌كه‌متر له‌ماوه‌ی‌ ساڵێك 9 ملیار و 500 ملیۆنمان داوه‌ به‌ رێكخراوه‌كان.

پارێزه‌ر هه‌ڤاڵ نه‌ژاد، چالاكی‌ كۆمه‌ڵی‌ مه‌ده‌نی‌ به‌ (سبه‌ی‌) وت: به‌شێك له‌ رێكخراوه‌كانی‌ كۆمه‌ڵی‌ مه‌ده‌نی‌ وه‌كو بازرگانی‌ سه‌یری‌ كاره‌كه‌ ده‌كه‌ن و ته‌نها له‌ پێناو وه‌رگرتنی‌ پاره‌و مینحه‌ رێكخراویان دامه‌زراندوه‌.

ئەوەشی وت: به‌شێك له‌و رێكخراوانه‌ی‌ كۆمه‌ڵی‌ مه‌ده‌نی‌ له‌لایه‌ن هه‌ردو حیزبی‌ ده‌سه‌ڵاته‌وه‌ به‌ناوی‌ جیاجیاوه‌ دروستكراون و له‌كاتی‌ پێویستدا به‌كاریان ده‌هێنن.

لە لای خۆشیه‌وه‌ فازڵ عومه‌ر، سه‌رۆكی‌ فه‌رمانگه‌ی‌ رێكخراوه‌ ناحكومیه‌كان جەختی کردەوە، ده‌بێت رێكخراوه‌ ناحكومیه‌كان هه‌ڵگری‌ چه‌ند خاسیه‌تێك بن كه‌ ئه‌خلاقی‌ و نیشتمانی‌ و رێكخراوه‌یی و كۆمه‌ڵایه‌تیه‌و بە (سبەی) وت "له‌ ئێستادا له‌هه‌رێمی‌ كوردستان هه‌زار و 130 رێكخراومان تۆمار كردوه‌ و له‌زیادبونیشدایه‌".

سه‌رۆكی‌ فه‌رمانگه‌ی‌ رێكخراوه‌ ناحكومیه‌كان باسی لەوەشکرد، کە ته‌مه‌نی‌ فه‌رمانگه‌کەیان چه‌ند مانگێكی‌ خایاندوه‌ و وتیشی "له‌و ماوه‌یه‌دا بۆ 427 پڕۆژه‌، (9) ملیار و 500 ملیۆنیان داوه‌ به‌ رێكخراوه‌ ناحكومیه‌كان".

بۆ بینینی لێدوانەکە لە ماڵپەڕی سبەی ئێرە کلیک بکە