08 April 2013

سێهەمین کۆنفڕانسی پێداچوونەوەی دژایەتی چەکی کیمیایی دەستی بەکارەکانی کرد

هەڤاڵ نەژاد 
ئەمرۆ دوو شەممە ٨-٤-٢٠١٣ سێهەمین کۆنفڕانسی پێداچوونەوەی جیهانی قەدەغەکردنی چەکی کیمیایی لە شاری دەنهاخ (لاهای)ی هۆلەندا  بە بەشداری سەرۆکی رێکخراوی نەتەوەیەکگرتووەکان و سەرۆک و نوێنەری  ١٨١ وڵات و زیاتر لە ٧٠ رێکخراوی جیهانی دەستی بەکارەکانی کرد.

کۆنفرانسەکە لە لایەن رێکخراوی دژایەتیکردنی چەکی کیمیایی (OPCW) بەڕێوە دەچێت و بڕیارە تاوەکو ١٩ی ئەم مانگە بەردەوام بێت.
لەو کۆنفڕانسەدا بۆ یەکەم جار بان کی موون، وەک یەکەم سکرتێری نەتەوە یەکگرتووەکان بەشداری کرد و پشتگیری نەتەوەیەگرتووەکانی بۆ ئەو رێکخراوە و کارەکانی دووپات کردەوە، هەروەها داواشی لە وڵاتانە کرد کە ئەندامی ئەم رێکخراوە نین، پابەند بوونی خۆیان بە زووترین کات بۆ رێکخراوەکە رابگەیەنن.
تا ئێستا نزیکەی ٨ وڵات بەشداری ئەو رێکخراوەیان نەکردووە و ئامادە نین کار بۆ دژایەتی چەکی کیمیایی بکەن، لەوانە سوریا، کۆریای باکوور.
هەر لەو کۆنفرانسەدا بریکاری وەزیری دەرەوە محەمەد دورکی وتاری عێراقی خوێندنەوە و بە کورتی و بە دێڕێک ئاماژەی بە تاوانی هەڵەبجە کرد کە تێیدا چەکی کیمیایی دژی خەڵکی ئەو شارە بەکارهاتووە.

شیاوی گوتنە، ئامانجی ئەو کۆنفرانسە، نەهێشتنی چەکی کیمیایییە و دەیانەوێت کار لەسەر بڕیاری ژمارە ١٥٤٠ ئەنجومەنی ئاسایشی نەتەوە یەکگرتووەکان بکەن کە بۆ ئەو مەبەستە دراوە.

لەو کۆنفرانسەدا ژمارەیەک رێکخراو و کەسایەتی کورد بەشداریان کردووە، یەک لەوان رێکخراوی کوردستان بێ جینۆسایدە و من (هەڤاڵ نەژاد) و رەنجدەر گڕاوی وەک نوێنەری ئەو رێکخراوە داوەت کراوین و بەشداریمان کردووە، هەروەها رێگەمان پێ درا دوو ستاندی رێکخراوەکەمان کە وێنەی شاری هەڵەبجەی قوربانی چەکی کیمیایییە و ئاماژەیە بەو تاوانە بە هەردوو زمانی هۆڵەندی و ئینگلیزی دابنێین.






0 سەرنج:

Post a Comment