11 September 2011

هه‌ڤاڵ نه‌ژاد: ئەو كەسەی تاوانی زۆر بچووكی كردووە، لەگەڵ بازرگانی ماددە هۆشبەر و تیرۆریست و بكوژەكاندا لە هۆبەیەكدایە و ئەمەیش پێشێلكردنی مافی مرۆڤـە لە هەرێمی كوردستاندا


دیراسەی پڕۆژەیاسای لێبووردنی گشتی دەكرێت 
 ژیوار ئیبراهیم
بە باوەڕی چاودێران و پەرلەمانتاران، لیژنەی مافی مرۆڤ ئەگەرچی توانیویەتی هەندێك هەنگاو بهاوێت، بەڵام نەیتوانیوە چاودێریی حكوومەت لەسەر پرسەكانی پێوەندیدار بە مافی مرۆڤ بكات. چالاكێكی ئەم بوارەیش، دەڵێت كە لیژنەی نەزاهە پاكانە بۆ دەستەڵاتی سیاسی دەكات.

بەپێی ماددەی (38) لە پێڕۆی ناوخۆی پەرلەمانی كوردستان، لیژنەی (سكاڵاكان و مافی مرۆڤ) وەكوو لیژنەیەكی هەمیشەیی پێك هاتووە و لە سەرەتایشدا ئەركی لیژنەی مافی مرۆڤ كاركردن بووە لەسەر بنەمای سكاڵاكانی هاووڵاتیان،
بەڵام لە ئێستادا بە باوەڕی هەندێك پەرلەمانتار و چاودێری مافی مرۆڤ و كاروباری مەدەنی، لیژنەی مافی مرۆڤ كاری باشی كردووە، وەلێ نەیتوانیوە خۆی لە قەرەی هەندێك بابەتی گرنگ بدات.

ئەندامی لیژنەی مافی مرۆڤ (هاژە سلێمان)، لە لێدوانێكدا بۆ “هەولێر”، گوتی كە كارەكانی لیژنە بەسەر كەیسەكانی ئەنفال و جینۆساید و ئاوارە و پەنابەران و هەروەها زیندانییەكان و پێوەندیكردن بە ڕێكخراوە جیهانییەكان دابەش بووە. ئەو، ڕوونیشی كردەوە: “سەبارەت بە ئاوارە و پەنابەران داوامان كردووە كە هیچ كەس بە زۆر نەنێردرێتەوە كوردستان.”

ئاشكرایشی كرد كە لەگەڵ فیدراسیۆنی پەنابەران ل ڕێگەی فڕۆكەخانەكانی نێودەوڵەتیی هەولێر و سلێمانی ڕێگە لە بەزۆرناردنەوەی پەنابەران بگیرێت. (هاژە سلێمان)، پێی وایە كە لەو كارەیشدا سەركەوتوو بوونە. لە لایەكی دیكەیشەوە و سەبارەت بە ئاوارەكان، گوتی كە بەردەوام سەردانی ئاوارەكانی سەرسنووری هەرێم دەكەن و بەدواداچوونیشیان لەسەر بارودۆخیان كردووە.

(هاژە) لە بارەی بارودۆخی زیندانییەكانیشەوە، ئەوەی خستە ڕوو كە كەموكوڕیی بنكە چاكسازییەكانیان ڕەوانەی سەرووی خۆیان كردووە. بە هەموو ئەوانەیشەوە، ئەو پێی وایە كە “هەندێك كەیس بەسیاسی كراون و ئێمە نەمانتوانیوە كاریان لەسەر بكەین.”

هاوكات چالاكوانی بواری كاروباری مەدەنی و مافی مرۆڤ لە كوردستان (هەڤاڵ نەژاد)، سەبارەت بە لیژنەی مافی مرۆڤ لە كوردستان، بە “هەولێر”ـی ڕاگەیاند كە ئەو لیژنەیە كاریان لەسەر زیندانییە ناسیاسییەكان كردووە و چەند جارێكیش كەیسی ئەنفال و بارودۆخی كەسوكاری جینۆسایدی ورووژاندووە، بەڵام بە باوەڕی (هەڤاڵ) ئەو لیژنەیە زۆر جاران پاكانە بۆ دەستەڵاتی سیاسی لە كوردستاندا دەكات.

ئەو، گوتیشی كە لیژنەی مافی مرۆڤ هیچ لێپێچینەوەیەكی لە وەزیرە پێوەندیدارەكان نەكردووە و نموونەیش بە بارودۆخی مافی مرۆڤ لە ڕووداوەكانی ئەم دواییەی سلێمانی دەهێنێتەوە كە لیژنەی پێوەندیدار بە مافەكانی مرۆڤ، داوای وەڵامی لە حكوومەت نەكردووە.

لە لایەكی دیكەیشەوە، بە باوەڕی ئەو چالاكەی بوارەكانی مافی مرۆڤ، لە زیندانە سیاسییەكانی كوردستاندا شوێنی جیا بۆ تاوانە جۆراوجۆرەكان نییە و ئەو كەسەی تاوانی زۆر بچووكی كردووە، لەگەڵ بازرگانی ماددە هۆشبەر و تیرۆریست و بكوژەكاندا لە هۆبەیەكدایە و ئەمەیش بە باوەڕی ئەو، پێشێلكردنی مافی مرۆڤـە لە هەرێمی كوردستاندا.

(هەڤاڵ نەژاد)، گوتیشی كە لە كوردستاندا هەندێك جار خەڵكانێك بە بێ بڕیاری دادوەر دەستگیر دەكرێن، ئەوەیش لە كاتێكدایە كە سەرۆكی هەرێم بڕیاری داوە كە نابێت چیی دیكە هیچ كەسێك بە بێ بڕیاری دادوەر بگیرێت.

ئەو، هەروەها گوتیشی كە ڕاگرتنی زیندانی كاتێكی دیاریكراوی (6) مانگی هەیە، بەڵام بە باوەڕی (هەڤاڵ) لە كوردستاندا كەم نین ئەو كەسانەی چەندان ساڵە لە زینداندان، بەبێ ئەوەی دادگەیی كرابن. هەمووی ئەوانەیش بە باوەڕی ئەو چاودێر و چالاكە، پێشێلكردنی مافی مرۆڤن لە كوردستاندا كە پێویستە لیژنەی پێوەندیدار كاری جیددییان بۆ بكات.

بەپێی بڕگەی (ح) لە ماددەی (37)ـی پێڕۆی ناوخۆی پەرلەمان، لیژنەی مافی مرۆڤ لەسەریەتی كە خشتەیەكی مانگانەی تایبەت ڕێك بخات و پوختەی ئەو سكاڵایانەی كە سەیر كراون، ئەنجامەكانیانی تێدا بنووسرێن، بەڵام تاكوو ئێستا ئەو بڕگەیەیش لە لایەن لیژنەی مافی مرۆڤەوە جێبەجێ نەكراوە.

سەرۆكی لیژنەی مافی مرۆڤ (سالار مەحموود)، بە “هەولێر”ـی ڕاگەیاند كە لیژنەی مافی مرۆڤ سەبارەت بە تێكەڵاویی كەیسەكان داوای لە لایەنە پێوەندیدارەكان كردووە كە بینای چاكسازیی “مەحەتە” و “مەعەسكەر سەلام” بگۆڕێن بۆ ئەوەی بتوانرێت كەیسەكان لێك جیا بكرێنەوە. ئەو ڕوونیشی كردەوە كە بینای چاكسازی لە هەولێر كاری باشی تێدا كراوە و چاودێرییشیان دەكەن.

(سالار مەحموود)، ئاماژەیشی بەوە دا كە “بۆ چارەكردنی كێشەی چاكسازییەكان، داوامان كردووە كە لێبووردنی گشتی دەربكرێت، چونكە بە باوەڕی ئەو كۆمەڵێك زیندانی زۆرینەی حوكمەكەیان تێپەڕاندووە، لە ئێستایشدا خەریكی دیراسەكردنی پڕۆژەیاسای لێبووردنی گشتین.

بە هەموو ئەوانەیشەوە، (سالار مەحموود) بە “هەولێر”ـی گوت كە پێویستە حكوومەت ڕاپۆرتە نێودەوڵەتییەكان بەهەند وەربگرێت. ئەو، نایشیشارێتەوە كە لە هەرێمی كوردستاندا هەندێك جار مافی مرۆڤ پێشێل دەكرێت.

ئەوەیش لە كاتێكدایە كە بە باوەڕی ئەو، مافی مرۆڤ پاڵپشتی دیموكراسییە و هەروەها پێوەرێكیشە بۆ ناسینی كۆمەڵگەی كوردی بە هەموو جیهان. ئەو نەیشیشاردەوە كە بە گشتی بەدەنگەوەهاتنەكان بە تایبەت لە لایەن پەرلەمانی كوردستانەوە، جیددی نین.

سه‌رچاوه‌: ژماره‌ 1137 ی رۆژنامه‌ی هه‌ولێر- لاپه‌ره‌ی 7

تێبینی هه‌ڤاڵ: ئه‌مه‌ به‌شێکی لێدوانێکی درێژتری منه‌ بۆ رۆژنامه‌ی هه‌ولێر، چاپی هه‌ولێری پایته‌ختی باشووری کوردستان.

0 سەرنج:

Post a Comment