هەڤاڵ نەژاد
ئەوانەی لە ناو کوردا بە رۆشنبیر دەناسرێن، بە زۆری
ئەوانەن قسە لە بارەی سیاسەت و حکومڕانییەوە دەکەن بەگشتی. ئەو کەسانە کەشێکی
وایان خوڵقاندووە هەموو شتێک دەبەنەوە بۆ سەر سیاسەت و هەرچی بابەتی ترە نادیدەی
دەگرن، لە کاتێکدا لە کۆمەڵگەی ئێمە سادەترین و ناسیاسیترین کەس زمانی بکاتەوە،
ئەوا بە ئاسانی دەتوانێ بە کاتژمێران باسی سیاسەتت بۆ بکات!
بە بڕوای من، کۆمەڵگەی ئێمە پێویستی بەو رۆشنبیرە
سیاسیانە نییە کە دنیایان لەبەر چاوی خوێنەر و بەردەنگەکانیان کردۆتە رەش یا سپی.
مرۆڤی کورد، سیاسەت کوشتوویەتی و هەموو شتێکی لێ وەرگرتۆتەوە. کۆمەڵگە، پێویستی بە
رۆشنبیرانێکە بێن قسە لەسەر پەروەردە، ئاکار، خێزان، تاک، ئاین، ژیانی کۆمەڵایەتی،
بەگشتی ئەو باسانە بکەن کە پەیوەستن بە تاک و ژیانی تاکەوە.
پێویستمان بە رۆشنبیرانێکە پەنجە بخەنە سەر برینەکانمان
و، بە ئازایانە و راستگۆیانە هەموو ئەو دەردانە شیکار بکەن کە بوونەتە هۆی ئەوەی
کۆمەڵگەیەکی ئاوا ناتەندروستمان لێ دەرچووە. پێویستمان بە رۆشنبیرانێکە چاکسازی و
ریفۆرمی کۆمەڵایەتی بەرپا بکەن لە کۆمەڵگەمان، نەک رۆشنبیرانێک کە دەیان ساڵە
نەیان توانیوە هیچ دەردێک تیمار بکەن و خۆشیان بوونەتە سەربار بەسەر دەردانەوە و
هێندەی سیاسییەکان تاوانیان بەرامبەر ئەم کۆمەڵگەیە ئەنجام داوە.
بەڵێ پێویستمان بە رۆشنبیری ئاوا هەیە، نەک ئەوانەی
تەنها دەزانن لە بارەی سیاسەتەوە بدوێن و هەموو شتێک دەگێڕنەوە بۆ سیاسەت، لە
کاتێکدا دەکرێ سیاسەت بەرهەم و ئەنجامی زۆر بابەتی دیکەی کۆمەڵگە بێ کە لای ئێمە
هیچ کاتێک باس نەکراون و کاریان لەسەر نەکراوە.
دڵنیام هەرکاتێک ئەوە کرا، ئەو دەم سیاسەتیشمان رێڕەوێکی
زۆر راستر و باشتر لەمەی ئێستا هەیە دەگرێتەبەر.
0 سەرنج:
Post a Comment