هه‌ڤاڵ نه‌ژاد
به بڕوای من عێراق سه‌یر نییه و ئه‌وه‌ی تێیدا گوزه‌راوه چاوه‌ڕوانکراو بووه. له مێژووی دروستبوونی عێراقه‌وه هه‌ر ده‌سه‌ڵاتێک به پاشایه‌تی و کۆمارییه‌وه هاتبێته سه‌ر ده‌سه‌ڵات، له رێگه‌ی زه‌بر و توندوتیژییه‌وه ره‌فتاری کردووه، ئه‌مه جگه له‌وه‌ی هه‌موویان به‌رامبه‌ر کورد، سیاسه‌تی قڕکردن و له ناو بردن و دواتر گه‌یشتنه لوتکه له شاڵاوی جینۆسایدی هه‌ڵه‌بجه و ئه‌نفالیان پێڕه‌وی کردووه.
بۆیه ئه‌و کولتووره سیاسییه‌ی له عێراق له گۆڕێدایه، کولتووری دژایه‌تیکردن و توندوتیژی و دیکتاتۆرانه‌یه. ئۆپۆزسیۆنه‌کانی ئه‌وێ رۆژێی عێراق، هیچکامیان له سه‌ر پێوه‌رێکی دیموکراتییانه ئۆپۆزسیۆن نه‌بوون، شیعه‌کان مه‌زهه‌بی و ئه‌وه‌کانی دیکه نزیکه‌ی هه‌موویان نه‌یاری خودی سه‌دامی دیکتاتۆری پێشوو بوون، به‌شێکی زۆریان له هاوکار و به‌رپرسه‌کانی رژێمی به‌عس بوون و به‌هۆی ناکۆکی که‌سێتییه‌وه بوونه ئۆپۆزسیۆن، نه‌ک ناکۆکی ئایدۆلۆژی یا خود به‌هۆی بوونی به‌رنامه‌ی باشتر بۆ حوکمڕانی.
هه‌رچی په‌یوه‌ندی به کورده‌وه هه‌یه، هه‌میشه له هه‌وڵی ئه‌وه‌دا بووه خۆی وه‌ک عێراقییه‌کی باش لای گه‌لی سه‌رده‌ست و ده‌سه‌ڵات و ئۆپۆزسیۆنه‌کانی پیشان بدات. له کاتێکدا مێژووی هه‌موویان ئه‌وه ده‌ڵێت که هیچییان جیاوازییه‌کی بنه‌ڕه‌تییان نییه بۆ رووانین له کورد و پرسه نه‌ته‌وه‌ییه‌که‌ی. به‌ڵام پارته‌کانی باشووری کوردستان هیچکات له‌و سیاسه‌ته‌یان پاشه‌کشێیان نه‌کردووه و تا ئێستاش بره‌وی پێ ده‌ده‌ن. ئه‌وه‌تا ئێستا جگه له بارزانی و تاڵه‌بانی و پارته‌کانیان، هیچ یه‌ک له لایه‌نه‌کانی دیکه له خه‌می دروستکردنه‌وه‌ی عێراقدا نین و ئه‌وانن له به‌غداد و هه‌ولێر و سلێمانی خه‌ریکی پێکهێنانی لایه‌نه ناکۆکه سیاسییه‌کانی عێراقن. ئه‌وانیش وه‌ک هه‌میشه له دژایه‌تی کورد که‌مته‌رخه‌میان نه‌کردووه، ته‌نانه‌ت ئه‌وه‌ی پێی ده‌ڵێن عێراقی فیدڕاڵ و فیدڕاڵیزم، ته‌نها کورده باسی ده‌کات و هیچ لایه‌نێکی دیکه له لێدوان و سیاسیه‌تیان باس له فیدڕاڵی ناکه‌ن و ته‌نێ به عێراق و عێراقی یه‌کپارچه ناوی ده‌هێنن و چه‌ندین جار به ئاشکرا دژایه‌تی فیدڕاڵیان کردووه و دواهه‌مین جاریش مالیکی سه‌رۆک وه‌زیر بوو که گوتی سیسته‌می فیدڕاڵی بۆ عێراق گونجاو نییه!
ئه‌م سیاسه‌ته هه‌ڵه‌یه‌ی پارتی و یه‌کێتی له بنیاتنانه‌وه‌ی عێراقی به‌ناو دیموکراتی و له‌ناوبردنی هه‌لی سه‌ربه‌خۆیی پاش روووخانی سه‌دامی دیکتاتۆر و هه‌ڵسوکه‌تکردنیان وه‌ک دوو پارتی به‌رژه‌وه‌ندی ویستی نا نه‌ته‌وه‌یی، بۆته هۆی ئه‌وه‌ی ده‌سه‌ڵاتدارانی عێراقی ئه‌مڕۆ و ئۆپۆزسیۆنه‌کانی دوێنێ، بکه‌ونه پیلان دانان و هاوکاری کردنی تورکیا و ئێران بۆ دژایه‌تی کردنی گه‌لی کورد و ئه‌زموونی فیدڕاڵی باشووری کوردستان.
ئه‌وه‌تا ده‌بینین رۆژانه هێرش و ده‌ستدرێژی تورکیا و ئێران، بۆ سه‌ر باشووری کوردستان به‌رده‌وامه و حکومه‌تی هه‌رێمی کوردستانیش تا ئێستا وه‌ک پێویست هه‌نگاویان هه‌ڵنه‌هێناوه بۆ چاره‌سه‌رکردنی بارودۆخه‌که، ته‌نانه‌ت گومانی ئاگاداربوونیان له‌م هێرشانه دوور نییه و چه‌ندین جار به‌رپرسانی ئێرانی گوتوویانه به هاوکاری و ئاگاداری حکومه‌تی هه‌رێم تۆپباران ده‌کرێت، له‌م رۆژانه‌دا بریکاری وه‌زیری ده‌ره‌وه‌ی عێراق، گوتی: تا ئیستا حکومه‌تی هه‌رێم راپۆرتی له باره‌ی هێرشه‌کانی تورکیا و ئێران نه‌داوه‌ته ئێمه تا بیده‌ینه نه‌ته‌وه‌یه‌کرتووه‌کان. له کاتێکدا ده‌کرا حکومه‌تی هه‌رێم له رێگه‌ی وه‌زاره‌تی ده‌روه‌ی عێراقه‌وه راپۆرتێک بداته نه‌ته‌وه‌یه‌کگرتووه‌کان و ئه‌نجومه‌نی ئاسایشی نێوده‌وڵه‌تی بۆ ده‌ستینیشانکردنی بارودۆخه‌که له ڕووی نێوده‌وڵه‌تییه‌وه و بڕیاردان له سه‌ری، که به ئه‌گه‌ری زۆره‌وه ئه‌گه‌ر ده‌سه‌ڵاتی باشووری به رژدی کاری له سه‌ر بکرادایه، له‌وانه‌بوو ئه‌نجومه‌نی ئاسایش به‌پرسیاره‌تی نێوده‌وڵه‌تی بخاته ئه‌ستۆی ئه‌و وڵاته هێرشکه‌رانه و ناچار به قه‌ره‌بووکردنه‌وه‌ی بکردبان.
سه‌رنج:
ئه‌م نووسینه، وه‌ک کۆمێنتێک بۆ وتاری (عێراقێکی سه‌یر)ی کاک به‌ڵێن ساڵح، له به‌شی کوردی ده‌نگی ئه‌مریکا نووسراوه. پێمباشه لێره‌شدا وه‌ک نووسینێکی سه‌ربه‌خۆ بڵاوبێته‌وه.
0 سەرنج:
Post a Comment